వెడలిపోయే తరం
ఆకలి పేగులూ,అనారోగ్యాలూ
కలసి ఉన్నాయక్కడ.
ఆశల ఊసులూ,అసహాయతలూ,
కలసి పలుకుతున్నాయక్కడ.
ఆప్తులను వదలేసి అన్నాఅర్తులై,
అలమటిస్తున్నారక్కడ.
గెంటివేయబడిన ముసలితనం పై జాలిపడి,
ముద్ద వేస్తున్నారక్కడ,
మనవళ్ళతో ముద్దులాడాల్సిన వయస్సులో,
సమ ఉజ్జీలతో సమయాన్ని సాగదీస్తున్నారక్కడ.
ఇంటి ఆవరణలో తావెందుకు లేదో,
అడిగితే రకరకాల కారణాలు వినిపిస్తాయక్కడ.
ఒలుకుతున్న పలుకుల్లో దిగుల ముళ్ళు,
గుండెలో సూటిగా గుచ్హు కొంటాయక్కడ
ఉబుకుతున్న కన్నీళ్ళలో నిప్పురవ్వల,
బ్రతుకు బూడిద రాలుతుందక్కడ.
మృత్యువు పిలుపుతో ముసలి గువ్వలు ,
నీ తరం కోసం చోటు ఉంచిపోతున్నారక్కడ.
అయిన వాళ్ళను తరిమి వేసి దూరం చేస్తే,
నీ ముంత నీ కొసం తలాకిటనే ఉంటుదక్కడ.