వలస

    

    వలస

     గంపెడు చీకటి  నెత్తినెత్తుకొని ,
     నగరంవైపు అడుగులేస్తూ.

     కట్టడి  బతుకుల నుండి,
     వత్తిడి బతుకుల వైపుకు తిరిగి.

     డొక్కలెండగట్టుకొని  పరుగులెత్తుతూ ,
     కాకినోట్లో కప్పపిల్లలా విలవిల్లాడుతూ .

     అనాగరికుడివనే  అపకీర్తి నీ,
     అసమర్దుడివనే  భుజకీర్తినీ  మోస్తూ,

     మురికివాడల్లో మునిగితేలుతూ ,
     సవతి ప్రేమ చూపించే  పట్టణాలలో,

     వలస  ఉగ్గ్గుపాలు తాగే  అమాయకుడా...

     ఎక్కడ చూసినా వ్యసనాల  పలకరింపులూ ,
     ఎంగిలి  మెతుకుల   విదిలింపులూ ,

     నేడు శ్మశానాలు  సైతం మతాల జెండాలెత్తాయి
     శవాలు  సైతం రాజకీయ  కవాతులు చేస్తున్నాయి.

     సరిహద్దుల యుద్దాలలో  నలుగుతూ ,
     సమైఖ్యతా  రద్దులలో  నానుతూ,

     దేశపటం  చెదలు పట్టింది,రహదారులన్నీ నెర్రిలిచ్చాయి.
     అందుకే అడుగు కదపకు, 
     ఉన్నఊరునూ, కన్నాతల్లినీ వదిలెళ్ళకు.