పొగచూరు బతుకులు.

పొగచూరు బతుకులు. 

వింటావా  దుర్బర దారిద్య వాతపడ్డ  ఆకలి కేకలు.

చూస్తావా గూడులేని రోడ్డు బతుకులు.

వింటావా  ఆకలి పేగుల ఆగని  కేకలు.,

చూస్తావా చెత్తకుప్పలలో ఏరుకు  తినే ఎంగిలి ఆకులు.

అటు చూడు  ఓ చెల్లి చిరుగుల చీరలో సిగ్గుతో చితికిపోతుంది.

ఇటు చూడు ఓ తల్లి  ఊపిరితిత్తుల్లో గాలిని బిడ్డ పుండుపై ఊదుతుంది.

ఇదిగో ఈ బుజ్జిముండ చూడు ఆరిపోయిన  ఐసు పుల్ల చీకుతుంది.

అదిగో ఆ బుడ్డోడు చూడు ఆగిన బండ్లు తుడిచి  అడుక్కుంటున్నాడు.

ఇక్కడ చూడు  దొరలు తాగేసిన ఖాళీ సీసాలకోసం  యుద్ధం తీరు,

అయ్యో అక్కడ చూడు ఇసిరిపారెసిన  ఎంగిలాకుల కోసం  జరిగే పోరు.

అక్కడ చెత్త కుండీ వెనుక చూడు  రేపటి పౌరులు  కనిపిస్తారు.

అక్కడ చెట్టు కింద చూడు దిక్కులేని వృద్దులు  కనిపిస్తారు. 

నిబద్దతలేని  జీవితాలు, తెగిన గాలిపటాలు.

అంతటా  పొగచూరిన బతుకులే, వెలుగులేని చీకటి బతుకులే..

గాడితప్పిన  ఈ  బడుగు బండిని  దారిలో పెడదాం.

శ్రమ జీవుల  స్వేదాన్ని   దోచేసే  ధనజీవులను ఎండగడదాం.

అశ్లీలపు చూపులనుండి  అక్కచెల్లెళ్ళకు రక్షణనిద్దాం.

చదువుకునే   తమ్ముళ్ళ కు  సాయమందిద్దాం.

చేయి, చేయి కలిపి  చెలిమి బాట వేద్దాం.

ఆత్మీయతనే అక్షయ పాత్ర చేద్దాం.

మనుషులమని మరోమారు  చాటుకుందాం.