చేతులు.

చేతులు


పాలబువ్వ  తినిపించి,
నిన్ను  మరిపించిన  చేతులు .

వళ్ళంతా  రుద్ది
నిన్ను శుద్దిచేసిన చేతులు.

ముక్కు తుడిచి,
నిన్ను ముద్దుచేసిన చేతులు.

వేడి అన్నాన్ని,ఆర్చుకు,మార్చుకు,
ఊది తినిపించిన చేతులు

గుండెకు హత్తుకొని,
పాలిచ్చి  పాలించిన చేతులు.

పోలమారిన నీకు పలుమార్లు,
నెత్తిన సుతారంగా కొట్టిన చేతులు.

కాల చక్రాన్ని తిప్పి,
కాయలు కాచిన చేతులు.


నీ రాత దిద్దుతూ..తన రేఖలను అరగదీసుకున్న  చేతులు.
పొట్టకోసం, బట్టకోసం శక్తి ఉడిగి  నీ ముందు చాపిన  ఆ చేతులు.

చిరుగు కొంగున దాచిన తాయిలం .. నీకీ రోజు,
సిల్క్ కొంగున దొరుకుతుందేమో చూడు.... చూడు, చూడు,

నువ్వు ఓ సారి  బాల్యం లోకెళ్ళి.. చూడు.
అక్కడ  నీ ప్రతి  అడుగూకూ  ... ఆసరా ఇచ్చింది  ఈ చేతులే


ముసలితనంలో  ముడతలు పడ్డ ఆ చేతులు,
ముద్ద  కోసం  నీ ముందు   చాపిన రోజు,
నువ్వు దాటింది ఉమ్మ నీరు కాదు, స్వార్ధపు  సెలయేరు.