మౌన రణం

మౌన రణం

ఇద్దరి మధ్యా నిశబ్దం రాజ్యం ఏలుతుంది,   

మాటల సౌధానికి మౌనపు వెల్ల వేసినట్లుంది. 

ఒకరి ఆలోచనలు ఒకరు పసిగట్టినట్లు ఉలికిపాటు, 

ఒకరి మాటలు ఇంకొకరు పలికినట్లు ఏమరుపాటు. 

ఏమైనా జరిగితే బావుండు,  ఎవరైనా వస్తే బావుండు,

ఎంతపోసినా పొంత నిండని పోగవంటి ఆలోచనలు.

వెలుగో వెడిమో తెలియని స్తబ్దత, 

ఆకలో అలకో తెలియని నైరాస్యత,

ఉండి   ఉండి చెళ్ళుమనిపించే    గత స్మృతులు. 

                            ***

చేయి చేయి పట్టుకొని భావి కలలకు రెక్కలు కడుతున్నప్పుడు,

హెచ్చవేతలేకాని  తీసివేతలు ఉండవని  లెక్కలు కట్టినపుడు. 

ఒకరి శిల్పాన్ని ఒకరు ఇష్టంగా చేక్కుకున్నప్పుడు,

అనుభందపు ఆకుపై అనుమానపు ముల్లు పడుతుందనీ.

అంతరాలను అసహనాల సెగలు అంటుకుoటాయనీ,   

మాటల తూటాలు  మనసు మర నుండి బయటకొస్తాయనీ,

తెలియని అవివేకం . . . . . . .  మాయమైన వివేకం. 

                             ***

ఏకాంతం కోసం అందరికీ దూరం అయ్యాం,       

రాజీ కుదర్చమని  ఎవరిని దేవురించలెం.    

కదిలే శవాల్లా . . . .  . . కాలాన్ని దోర్లిస్తున్నాం, 

పడిన ముడిని విప్పుకోవాలని చూస్తున్నాం, 

ఇద్దరిలో ఎవరో ఒకరు దూరాన్ని చెరిపేస్తే . . . . . రాబోయే ఆ చిన్ని ఆకారం సాకారమైతే . . . . .
రగులుతున్న మౌనరణం ముచ్చటైన పలుకుగా మారదా.

(సాహితీ ప్రస్తానం మాస పత్రిక May నెల సంచికలో ప్రచురితం)